Migallas Teatro realiza sesións de narración oral dirixidas a público infantil e familiar a cargo dunha contadora. Nestas sesións recupérase a forma de contar historias dun xeito tradicional. A palabra é a ferramenta básica que estimula a imaxinación de nenos e adultos e mantén a súa atención durante todo o relato.

É daquela unha actividade moi apropiada para campañas de animación á lectura e para abordar dun xeito ameno moitos temas importantes, pois os contos varían segundo os intereses da organización: a diversidade, o sexismo, as persoas maiores, os medos, o abuso da televisión etc.

Unha visita cultural teatralizada polo centro histórico dunha vila é unha actividade onde se combina a información cultural e histórica coas representacións teatrais a partir de personaxes e feitos relacionados cos lugares que se visitan. Deste xeito, os contidos transmitidos na visita fanse máis amenos e facilítase o achegamento á historia menos coñecida da vila que se visita.

Combínase neste percorrido o rigor da información histórica co humor, de modo que a visita resulte interesante e entretida para público de todas as idades e intereses.

En ¡Canta connosco! combínanse as cancións do disco do mesmo nome con accións dramáticas. Os temas que se tratan entre outros son: o coidado das mascotas; o consumismo na compra de xoguetes; a lectura como pracer fronte á TV e ós videoxogos; a importancia da imaxinación; o xogo do teatro; cancións que axudan a estudar; etc.

Os temas do disco que se interpretan neste espectáculo son: "Dime que fixeches", "O esqueleto", "O libro máxico", e "Ai, Patín".

“Camiño de historias” é un espectáculo constituído por varias historias de tradición oral procedentes de diversos continentes e enlazadas mediante cancións e ditos populares.

Cada relato é tratado dun xeito diferente combinando a narración con técnicas de expresión plástica e dramática. Así pois, nuns prima a palabra, noutros, as imaxes e noutros recupérase a arte dos actores e contadores ambulantes das feiras de antano.

Malia ser tradicionais, os contidos que tratan estas historias son actuais e próximos ós nenos e nenas:

"Un avó especial" é un espectáculo destinado a público familiar no que se aborda o tema da enfermidade do Alzheimer co obxectivo de axudarlles ós rapaces a comprender situacións que moitos deles poden vivir no seu contorno familiar.

Malia a seriedade do tema que trata ten un enfoque humorístico que persegue fomentar actitudes optimistas para afrontar os problemas da enfermidade e amosar a importancia que teñen os/as nenos/as para que os maiores vivan momentos felices.

Á parte da enfermidade, tamén se trata o tema da relación entre os/as nenos/as e os/as vellos/as en xeral así como diferentes modos de educar os rapaces por parte dos membros da familia.

Así mesmo, os avós preséntanse como transmisores da sabedoría tradicional e peculiar de cada pobo fronte á uniformidade cultural imposta pola publicidade e a sociedade de consumo.

Ditos tradicionais, lerias e enredos son un elemento máis da obra.

¿E se o cantamos? é unha peza na liña de “¡Canta connosco!” onde se combinan cancións con escenas breves para tratar temas como os xogos colectivos e tradicionais fronte ós videoxogos e ós xoguetes electrónicos; a importancia das relacións entre avós e netos; a violencia e a publicidade na televisión; xoguetes bélicos e sexistas; a problemática do galego e o castelán (pais e nais que falan en galego entre eles e en castelán cos fillos); a importancia da música e do baile; etc.

OBRA EN PROCESO DE ADAPTACIÓN

“O carballiño enfermo” é un espectáculo no que se combina o teatro de actor co de títeres grandes de mesa. A través dunha historia divertida trátanse cuestións como a inmigración, as semellanzas e as diferenzas entre os pobos e a necesidade de coñecerse, respectarse e cooperar uns cos outros para conseguir resolver os problemas ambientais e sociais comúns. Tamén se aborda a importancia das persoas maiores como fonte de sabedoría fronte á uniformidade cultural da sociedade de consumo.

As cancións compostas polos membros do grupo alternan coas interpretacións teatrais nas que se tratan en clave de humor temas moi próximos ós/ás espectadores/as como o machismo; os comportamentos sociais ; o consumismo; os prexuízos sobre a lingua galega; o fanatismo no deporte; a influencia da TV; o clasismo; a moda e a publicidade; etc. Entre as personaxes humorísticas atópase a popular Sra. de Palmírez do programa Luar da TVG.

Rosiña é unha nena que ten que quedar soa na casa mentres os pais van a unha reunión. Como ten algúns problemas para rematar os deberes decide investigar nun baúl onde o pai gardou moitas cousas para que non se manchasen coa pintura, pois está pintando a casa. Alí atopa un libro vello e ponse a ler nel. Tras as primeiras liñas empezan a pasar cousas estrañas e Rosiña e os seus amigos, o público, mergúllanse na aventura de piratas que está escrita no libro.

Máis tarde os rapaces e rapazas irán en procura da lámpada marabillosa que esqueceu un xenio en Arabia; actuarán na pista dun circo acompañados por un can pallaso e conducirán unha nave espacial por galaxias descoñecidas.

Migallas Teatro ten realizado diferentes espectáculos de temática histórica con motivo da celebración da festa medieval de Pontevedra denominada “Feira Franca”. O protagonista de todos estes espectáculos é o pobo, representado por uns 40 homes, mulleres, nenos e nenas da comarca, na súa maioría da parroquia de Xeve, que dan vida a personaxes do século XV.

Nestas representacións ó aire libre combínanse as referencias históricas co humor e a festa e teñen como obxectivo potenciar o aspecto teatral da Feira Franca e dar a coñecer feitos históricos que aconteceron nesta vila durante o século XV e que foron de gran transcendencia para o futuro de Galicia.

En "Cantacontos" os contos tradicionais ou de creación propia son arrequentados con cancións, música ou sons que contribúen a espertar emocións nos nenos e nenas. Todos os contos tratan cuestións próximas ós/ás nenos/as e convídanos a participar no seu desenlace. As cancións complementan os seus contidos.

• Idioma: galego
• Público preferente: Infantil e familiar.
• Xénero: Narración de contos e canción infantil.

OBRA FÓRA DE CARTEL TEMPORALMENTE

A partir dunha crítica a determinados estereotipos da arte dramática unha serie de escenas amosan que o teatro está na vida cotiá. Cuestións tan familiares como o fanatismo no fútbol; o uso ritual do galego en determinados contextos; a precariedade dos traballos; a febre do consumismo; a frivolidade dos telexornais; as discriminacións sociais no sistema educativo; etc. son tratadas cun humor crítico próximo ás persoas que viven ou sofren estas cousas que pasan.